MOAÑA GANA O DESAFÍO 2024

 A última xornada puntuable para o DESAFÍO RÍAS BAIXAS TIRO Á CHAVE 2024 rematou como as boas películas cun desenlace espectacular e feliz. Vaia, feliz para o equipo de MOAÑA Na última partida decidíase o campión. O enfrontamento era MOAÑA, con Luís López e Chufi contra HÍO, con Orlando e Luki. O sistema de competición fai que o equipo que xoga como local no enfrontamento elixa a parella. Neste caso HÍO elixiu a Orlando e Luki, unha parella de nivel máximo. A partir de aí, o cadro técnico de MOAÑA tivo que facer as combinacións correspondentes para escoller unha parella que nunca se enfrontara a Orlando e Luki e ao mesmo tempo debía ser unha parella de garantías. Pois ben, O Sultán das Bateas, director técnico do equipo azul, decantouse por L. López e Chufi, despois dun amplio debate cos seus compañeiros e non todos estaban de acordo, xa que, Chufi non xogara unha boa primeira partida.  En fin, hai veces que as boas ou malas decisións son irrecoñecibles.

 

 

 

 Pois si, chegaba a última xornada e HÍO e MOAÑA estaban empatados a 13 vitorias. A xornada comezou de maneira dramática para MOAÑA, quen perdeu no seu primeiro enfrontamento da xornada contra CANGAS, mentres HÍO lle ganaba a BUEU. Circunstancia que deixaba ás gaivotas do Morrazo sen marxe de erro. O equipo Morado de HÍO estaba por diante na xeral. Os dous equipos ganaron as súas segundas partidas. Moaña rezaba para que na terceira partida de HÍO contra CANGAS, o equipo vermello lle fixera un favor vencendo a HÍO. Dito e feito, o equipo cangués tivo unha xornada perfecta, ganou as 4 partidas disputadas e dicían os seus xogadores que se o DESAFÍO durase 2 xornadas máis, o título era seu. En fin, CANGAS pasou por enriba de HÍO e MOAÑA venceu a MOURENTE. 

Todo se decidiría no enfrontamento entre HÍO e MOAÑA. A partida foi moi igualada e de alto nivel de acerto. Por HÍO, Orlando con 12 chaves de 18 tiros foi o máis efectivo, Luki acertou 9 pellos de 18. Por parte de MOAÑA, López e Chufi acertaron 11 deses 18 pellos. Todo isto nas 3 primeiras tiradas, pero o inesperado e excepcional sucedeu na cuarta tirada de Luís López, fixo un pleno, ou sexa, acertou os seus 6 pellos. Un berro de admiración resoou en toda a Ría de Vigo e os seus compañeiros botáronselle enriba. Ao mesmo tempo, un sopro de alivio saiu da boca de Vicente Verdeal. O Sultán respirou con acougo despois de ter que tomar unha decisión tan arriscada como foi a de xuntar a López e Chufi. 

 

CANGAS foi o mellor da xornada, vencendo todas as partidas. O equipo estaba recuperado da mala actuación na xornada anterior na que só ganara unha partida. O equipo cangués partía como un dos candidatos a discutirlle o título a HÍO e MOAÑA, pero tivo varios tropezos inesperados contra Mourente e quedou sen opción. De todas as maneiras, o potencial do equipo vermello é para disputar o título ata a última xornada. 

MOURENTE, que debutou este ano no Desafío, tivo actuacións moi boas sobre todo contra CANGAS, equipo que se lle deu moi ben. Tamén venceu a BUEU varias veces. Certo que de momento non está á altura de HÍO e MOAÑA, pero o seu obxectivo debe ser consolidar o equipo e volver para o ano con novas expectativas. BUEU fixo o puido e incluso algo menos. O equipo amarelo ganou 2 partidas de 20 disputadas en todo o DESAFÍO. Todo pasa por comprarlle unhas lentes de contacto a Charri ou finalmente pasar por quirófano e retirarlle as cataratas ou o que sexa que ten nos ollos, pois, non se entende que sempre acerte co espazo que hai arredor da Chave. 

 

 ACTAS

CAMPIÓN 

MOAÑA

SUBCAMPIÓN 

HÍO

 

3º POSTO

CANGAS

 

4º POSTO

MOURENTE

 

5º POSTO

BUEU

 

FOTOS

 

 

4ª xornada CANGAS

 As gaivotas de Moaña acercáronse tanto a Hío que pasaron por Cangas como un furacán. Así, o equipo moañés venceu nas 4 partidas da cuarta xornada do DESAFÍO RÍAS BAIXAS DE TIRO Á CHAVE. Agora a cousa queda pendente de resolverse na última xornada puntuable do vindeiro sábado 31 de agosto. Será xogando como locais cando os de azul intentarán superar na xeral a Hío e levarse o título.

No campo 1 xogou Hío contra Bueu unha partida que se prevía moi desigual, xa que, o equipo amarelo de Bueu está no fondo da clasificación e Hío partía como líder. Petro e Kiji xogaban contra Rafa e Laxeiras. Bueu partía coa súa mellor parella para buscar un triunfo que os acercara ao seu obxectivo de non ser o pechacancelas. Ben, a partida comezou igualada ata a cuarta tirada na que Hío deu o golpe definitivo con Kiji metendo 4 puntos. 

Na segunda partida Cangas enfrontaba Mourente co optimismo de partir como favoritos. A cousa torceuse e de que modo para o equipo vermello. Mourente, con David e Manolo, forma unha parella de moito nivel e se o día e o vento están no norte os de Pontevedra poden facer sufrir a calquera parella. Así, Carlos e Ricardo quedaron sorprendidos e perdidos. Mourente levouso a vitoria. 

Na terceira partida Mourente e Hío dilucidaban outra partida bastante desequilibrada nas forzas. Desta vez, xogaron Rai e Jaime polo equipo pontevedrés e Orlando e Luki por Hío. Non houbo lugar a sorpresas e nin Jaime estivo moi acertado nin Orlando deixou de acertar máis do 50 % dos pellos. Polo tanto, xuntáronse dous feitos contrapostos, o acerto contra o desacerto. Hío triunfou. 

Na cuarta partida Bueu e Mourente xogábanse escapar da posición que ninguén quere. Vaia, semellou que Bueu si que a quería esa última praza da xeral, xa que, Carolo e Charri fixeron o posible e en ocasións o imposible para perder a partida. Manolo e David leváronse o triunfo con comodidade. 

Na quinta partida deste campo 1 Mourente xogou contra Moaña. Por Mourente tiraron Jaime e Rai e por Moaña Chufi e Albino. Vitoria azulona sen despeitearse. Nin Rai coa súa zurda eléctrica puido frear á parella máis elegante do equipo moañés, Os Chufinos.

 No campo 2 a primeira partida xuntou a Moaña e Cangas. Esta partida foi a de máis nivel da xornada, pois, despois de 3 tiradas rematou coa vitoria incontestable de Moaña. Suso estivo imperial e en 2 tiradas tivo 11 acertos de 12 pellos lanzados, bestial! López acompañouno con 7 acertos de 12 pellos. Aínda que Pablo e Jose estiveron moi ben cun 60% de acerto non lles chegou para evitar a derrota. 

Na segunda partida Moaña víase as caras con Hío. Outra das partidas clave para Moaña, se quería alcanzar o primeiro posto que ocupaba Hío. Desta vez, Suso e López venceron a Petro e Kiji en 4 tiradas. De novo Suso demostrou que tiña unha tarde acertada e volveu a superar o 60% de acerto. 

Na terceira partida un inferior Bueu medíase a un Moaña imparable que contaba as partidas da xornada por vitorias. Rafa e Laxeiras fixeron o que pudieron contra Chufi e Albino. Empezou a partida igualada e conforme o cansanzo se acumulaba nos brazos de Laxeiras, Bueu foi perdendo o norte e Rafa non puido evitar a derrota. 

Na cuarta partida Hío medíase a Cangas. O equipo morado coñecedor de que Moaña ganara as súas 4 partidas tiña que vencer para igualalo na xeral. Dito e feito. Orlando e Luki aproveitaron un 0 de Ricardo na segunda tirada para adiantarse e vencer a resistencia do equipo de Cangas. A pesar de todo, o equipo cangués prolongou a partida ata as 5 tiradas matando os pellos de Hío ata que Orlando acertou o tiro definitivo.

Na quinta e última partida Bueu encarou a Cangas con poucas esperanzas de triunfo. Carolo e Charri contra Pablo e Carlos foi a loita de David contra Goliat, dun trasatlántico contra unha dorna. En fin, o mexicano de Bueu, Charri, xa puxo de moda o seu lanzamento, "facer un Charri", ou sexa, non acertar ningún dos 6 pellos lanzados, cousa que adoita facer moi a miúdo o Got Talent Charri.

 

Agora a clasificación queda desta maneira tan igualada para o Título. Moaña e Hío xóganse o campionato en 4 partidas a lume de carozo. O resto dos equipos non é verdade que non se xoguen nada. Así, Mourente e Cangas discutiran a terceira praza do podio con vantaxe de 2 vitorias para o equipo vermello cangués. Incluso Bueu ten posibilidades, poucas de evitar o último posto. Deberá ganar as 4 partidas e que Mourente perda as 4 partidas. Cousa improbable, imposible sempre que Charri estea nos seus números (negativos). 

Agora ben, eses equipos que parece que se xogan algo menor ao título teñen a motivación dos incentivos que van recibir por parte de Moaña e Hío para estimulalos naquelas partidas que deben enfrontar a algún dos aspirantes ao Titulo. En definitiva, as clásicas e nunca demostradas primas a terceiros equipos. Por outra beira, está o clima de temor sobre as actuacións arbitrais. Tal é a cousa que a organización xa contratou árbitro do Comité Técnico da Federación Galega de Deporte Autóctono. Árbitros que viaxarán en batea desde Vigo o mesmo sábado pola mañá escoltados por lanchas bateeiras. Todo controlado, afirmaban desde a organización.

XORNADA FINAL DO DESAFÍO RÍAS BAIXAS TIRO Á CHAVE

SÁBADO 31 AGOSTO 17:30h

MOAÑA (Campo de Chave ao lado do Club de Xubilados Domaio)

Na foto aparecen o Xefe do Servizo Provincial de Deporte de Pontevedra, Daniel Benavides, o Presidente do Club Tiro á Chave do Morrazo, Vicente Verdeal e a secretaria do mesmo club, Bea da Silva, no campo de Chave de Domaio, lugar onde se disputará a última xornada do DESAFÍO.

Trofeos finais do DESAFÍO RÍAS BAIXAS TIRO Á CHAVE